ألفية الشاعر الأحوازي طاهر إسحاق القيّم

الالف  آه امن الدهر یا طـه               اقصور شُمخ ع َ الارض واطاها
الالف  آه امن الدهر و صروفه                 صار وَایّا اهل العلم بد شوفه
لا تکشّف کل حچی وتشوفه                   رُبّما جیفه وشلت مُغطاها

الباء بعد دنیاک ما تسوة عتب            خالفت یاصاح وأنجرها سَحَـب
چم سفیه الّي طمع بیها ولعب               تاه منها وما عرف معناها

التاء تواضع وإفتکر وانظر بعید                  لا یغرک لوأن ملبوسک جدید
وین کسری أو وین هارون الرشید                أو وین عاد ال يابها و وداها

الثاء ثبت معلوم عند اهل الفهم                مثل ما تکرم جبیلک تِنکرم
وال یشتم الناس لابد ینشتم                      والزِلم تدری الذی یدراها

الجیم جرح السیف مع جرح السنان           أهون عـلی الناس من جرح اللسان
حیث جرح السیف یبریه˚ الزمان                     و چلمتک للموت عیب انساها

الخاء خلیل الّی تمنیتهِ دِرِع                   صار لکن للعده عِز ومِنع
ردت بیه اصیبن وانتفع                      صاب وأجرح چبدتی وادماها

الدال دار الذل بیه لاتعیش              واسعه ارض الله عگلک لایطیش
غیر دارک دار یحصلک عریش             مثل روحک روح ماکو سواها

الذال ذِم إلدار و إرحل بالعجل              و لا تدحلب لو رِدت تعمل عَمل
الما الک بکنافها ناگه  و جَمل               لأي ش تتحمل ثقل بلواها ؟؟

الراء روحک ریحها أوسلیها                     دیر فکرک وإنظر التالیها
بعدهم دنیاک إتأمِن بیها             اش عاجبک منها وتحب ممشاها

الزاء زهت لزیاد یومٍ حبته                     خالفت بأیام غیره أو ذلته
رتبت واحد  و واحد خلته                 إلّی کان بسَفلها سُگم بَعلاها

السین سن السيف و البس لک درع             و لاتخاف من العساکر و الجمع
لايغرّک لو شفت يلده طبع                                يلد حيّه و العطب ناباها

الشین  شِم برق المعالی بالخیال              لا تعدی ایام عُمرک بالکسال
ال ما یذور السیف عن حوضه الرجال              إتهدم و تبنی علی مبناها

الصاد صاحب لک وَرِع من أب وجد          لا تذم اطباعه وتحقـّر أحد
إنما البگه دِمت عین الاسد                     حیرته و امتحن بدواها

الضاد ضَبع ال بالرخی عَنک یصد            لاتظن بلازمک یبقی  ویجد
اربعین مصباح لوصار إبعجِد                     عوجته تظهر علی مجراها

الطاء طاهر گال دِع عنّي الفکر            واعتبر بالفاتو اتأمَنَ شهر
مثل ما ضحکک یبکیک الدهر           لاتشوف سرورها  و تنساها

الظاء  ظليم ال ضيّعک يوم المضیج           ذاک عاقل بالحرب ماهو شفیج
والعدو العاقل اخیر من الصدیج                       لو سمح بجهالته او اداها

العین علّی الخاطر و ميّز بالهِجن           لا تمنینی أموتن بالحزن
لو متت عطشان عسی ماء المزن            لا یطیح ولا یبل أثراها

الغین غیر اهل العقائد والیقین        ما أشوف بهالزمن واحد أمین
لا یغرک هل کعک  من هالطحين      خشونته بنفس الخبُز تلگاها

الفاء فمک لو کان ساکن یحرسک         لا تحرکه بالمجالس یفرسک
أفلح بهالقول کل مَن درسک               وگع بیها او خاب من دساها

القاف قَلَت حیلته او صار الفقیر        یضوج مثل ام طوگ لو رادت تطیر
من تحط بالگاع، للگرجی تصیر                   و من تطیر،الباز یتلگاها

الکاف کَلمن جاهل قضی العمر          قدمته او أخرت راعی البصر
عاتبت دنیای او أدت لي العذر            گالت کل ذي ولدٍ تود ابناها

اللام لا تحزن علی الفات او گضی        لا ولا تفرح بمن جاک و رضی
إنما الدنیا الحشد منها الفضاء                 بالجحافل عافها او خَلاها

المیم من هو الشاف فی هذا الدهر         نجم واحد ینکسف غیر القمر
هذه شُغل الدر فی عمق البحر               و الجیّف تطغی علی اعلاها

النون نجمک لو  وگع تحت البروج          و نشف بحرک لاتهم بیها او تضوج
ترفع الدنیا الفروج من السروج                    و الرجال تگودها من الحاها

الواو ویه المیت ماینفع جواب        والدهر من عادته یدور الخراب
ما تشوفه ترتوی من الکلاب        و الضیاغم ماتبل احشاها

الهاء هوی مرکوبتی خلفی اوهوای          دوم جدامی او مطلوبی ضرای
ماشفت بالنار للظمآن مای                    و السماحة بعد عیب ارجاها

الیاء یبو یاسین عند اهل الفهم              الخیـر بالدنیا یخص والشر یعم
والنبی المختار دار من العلم                   ما یدهشه الجای مِن اگفاها

الهمزه یا بعد هذا الکلام                          یا أخی صلّی علی خیر الانام
احمد المختار مصباح الظلام                             مع إلعترة وصَحبته بتلاها

  نقلا عن : موقع علوان